Nellmapius en PEN

Die Nellmapius-aksie van ons gemeente fokus tans op vroeë kinderontwikkeling - die skep van veilige, liefdevolle en stimulerende voorskoolse versorging. Dit begin by opleiding, ‘mentoring’ en ondersteuning van die creche-personeel.

Ons steun hier geweldig op die kennis, jarelange ervaring en infrastruktuur van PEN. www.pen.org.za

Onder die vlerk van PEN word weeklikse tema-klasbeplanning aangebied. Daar is ook elke maand opleidingsessies in die middestad by die PEN kantore. Meeste juffrouens in informele creches het geen formele onderwysopleiding nie. Hierdie opleiding gee hulle die nodige kennis en vaardighede, maar doen ook wondere vir hul selfbeeld en persoonlike groei.

PEN doen kwartaalikse evaluering van elke skool, by hulle geregistreer. Tekortkominge word uitgewys, aanbevelings word gemaak en positiewe veranderinge word beloon. Tydens beloningsdae mag die presterende skole by die PEN ‘winkel’ kom opvoedkundige materiaal ‘aankoop’ d.m.v speel-beloningsgeld.

Danksy pragtige borgskappe vanuit ons gemeente kan ons nou ‘n broodnodige graad R onderwyseres vir een van die skole soek en aanstel. Ons het ook ‘n pragtige jong dinamiese dame in Nellmapius geïdentifiseer, Lerato Vilakazi. PEN lei haar tans op as coach en sy sal binnekort vir ons al die nodige voetwerk, opleiding, evaluering en motivering in die gemeenskap doen. 

Ons toekomsvisie vir Nellmapius is egter veel groter - bemagtiging van die totale gemeenskap. ‘n Naskoolsentrum, tiener ondersteuning, ouerleiding, bejaardesorg, sopkombuis, groentetuin kweking, vaardigheidsontwikkeling, selfbeeldbou en emosionele herstel, MIV- en ander gesondheidsdienste. Ons wil ‘n oase van hoop vir die gemeenskap skep.